Rev 11 | GbrGAW | STEP | A gami busi nyamwi nya, a gnami ge milo mi mwi aduwa nyakun, wato Shekwoyi nyakun. “N nyakun omi nya yi n bagadi dnanyi, ma ba a sujada zhinyi.

Revelation of John 11

Aku Shekwoyi Anabi Wu

1 A gami busi nyamwi nya, a gnami ge milo mi mwi aduwa nyakun, wato Shekwoyi nyakun. “N nyakun omi nya yi n bagadi dnanyi, ma ba a sujada zhinyi. 2 Ama a gnami ge ato mwi akpeda ebmi nyan. Gama ala kwo ga abye do. Ɓa ɓei dna ezhi gyi-gyi-yi har apya shinyi-cei-aba. 3 Mi ɓei ga emi aseida-da ngun aba ɓa zhin anabci, anyipyei, dubu gmanyi n tagyi yi ngun aba n cei kpe shi tnanyi. (1,260) n na aje sakunyi kpe.”

4 Anabi ngun aba ye nu zhin a zaitun ashinwan ngun aba, nna kandle busiyi ngun aba nɓa gni agni zhi n Shekwoyi anyi vinya nya abye nyi. 5 Oza n wa zhin atna wa wuba, ena ɓa kun n ɓa egbe kwa wu wo. 6 Ɓa n ikoyilo ɓa gu eshe to ogma zhin har aye ngun ata n tokunyi (3.5) shi ɓa ɓei zhin anabci. A pmi, ara n na anuwan yakwoyi ɓa ze ami, ɓa tnu n na anyasan a dnagmayi cici shi ɓa n cei pma.

7 Esa n ɓa ɓei ku zo n ba seida yi aye ngun ata n tokunyi, oza nukwoyi n wo gmiɓe n obwotnanceyi nyi, wo ɓei ya okun n ɓayi, woi gyi nasara n ɓa tukwo woi wuɓa. 8 – 9 Oɓa anayi ɓei yakpe n Urushelima azokwo yakwo har anyipyeyi ngun ata n tokunyi (deidei nu n na yikwo ge Sodon kwo Masar) aba n na aɓei zun ɓa Dagayi dunyi. Ato ɓei ye ge zaho-zahoi wo bi ɓan, aza n mwa begye n na akni do, n ɓa ɓei ɓe ɓai gye ɓa nayi. 10 Aɓei sun n na anyi vinya, aɓei da aza n na ba vinya ɓai zhin aje cauta, ɓai yi aje ɓa yezhi ɓai dagma n tu n na anabi n gun abaye efi ɓo, gama ɓaku wahala gaɓa n mwa.

11 Ama n anyipyeyi ngun ata n tokunyi avun, Zafun wye-wyeyi nya n kwo gmi n Shekwoyi aba nyi, kwo ɓei lo ɓa mi, ɓa kuka zhin n na agni aza ɓai wo edna n mwa. 12 N avun begye yakwo ɓei sawyi n eshe, nge, “Gunzhi ɓe,” ɓai kukala gun eshe oɓa nuwunyi gye.

13 N esa gmanyi-i, anyi ɓei shan-shan ɓai wu ezhi yi ajegna ngun awo, kwoi wu aza dubu tnaba (7,000), n na vun aza nɓa ce zhi n wye-wyeyi ɓa ɓei wodna n mwa, ɓa ga Shekwoyi mwa-mwa, n wo dna n Eshe nyi.

14 Owyi, bayi nla duya, ama tayi to shan zegnin.

15 Gama n sayi nu n malaika tnabayi ɓei bye mwayi abegye yakwo ɓai da ɓo n eshe, nge, “Ebe anyi nya nsai ye zhin, eyi Dagayi nyanu n wo Kristi yi wa gyi ebe nyalo-nyalo.”

16 A tukwoda shiba cei anyi nɓa sase kpe n ashinkpegye-esu nya n Shekwoyi abye nyi, ɓa yazhi ɓa ga wo mwa-mwa ɓai gna. 17 Yi zhin godiya, Dagayi Shekwoyi ikoda nwo nyi, n wo ɓei nyi, nsaye ho la ya ɓebegyi, n ho iko yakwo yi. 18 Akni vinya ɓa gyi minagyi n hoi, ama oho esa nyi n ho ɓa gyi minagyi nɓai, esa la si n ho ɓa da azafi owa, ha ga oho abara lada anabi n na azajei nɓa wo ho Eye dna, – dnagmayi n nawyi yi vinya, wa wu aza n ɓa ɓe n bwi-bwi yi n na anyi.

19 N navum dna n eshe, a gu Shekwoyi aduwa nyakun ya, n na ɓa gyewo akwati alkawali nya. Ogma bmiya, kwoi sawyi agmakuta yakwoi ɓe, anyi ɓa shan-shan n asha-sha dnagmayi.